客家的米食有哪些？又是怎麼做的呢？就來客家米食樂一探究竟吧！

心肚有一個所在，白雲升起，鳥仔滿天飛；
心肚有一個所在，光在唱歌，鳥仔飛上飛下。
行過長巷去，最深个位所有一間食堂。

頭家講：
「歡迎大家，來到客家米食樂，
𠊎兜个特色係所有食物做下係用米做个哦。」

人客問：
「客人个米食，有當多種類無？」
頭家應講：
「你聽過客家粄十唸無？
頭錐，油錐仔。
二粢，粢粑。
三甜粄，鹹甜粄，番豆粄，紅豆粄。
四惜圓，粄圓，惜圓，圓粄。
五包，豬籠粄，番薯菜包，艾菜包。
六粽，米粽，粄粽，焿粽。
七碗粄，水粄仔。
八摸娑，米篩目。
九層粄，粄條、面帕粄。
十紅桃，紅粄，紅龜粄，長錢粄，新丁粄。
你䀴，淨粄類就有恁多種呢。」

「做麼个客人有恁多用米做个食物呢？」
頭家應講：
「食飯較耐枵啊！
頭擺農耕時代，客人戴在山區，
耕種收成了後，為着利便保存、好帶，
會將糯米做咧各種粄个食品。

另外，到咧過年過節，
家家屋屋也會挨米，
再加上各種配頭，
做出各式各樣米做个點心，
來祭拜神明、祖先，
保佑闔家平安，抑係招待親戚朋友。」

人客問：
「過年過忒斯係正月半哩，愛食麼个正好呢？」
頭家講：
「愛來一碗糯米做个惜圓無？
燒熝熝仔、承牙，又毋會黏哦。」

摎糯米，秥米，摎水挨做粄漿，
再裝入布袋肚，用石頭矺出多个水分，
這就係粄粹。

取一部分煮熟做粄嫲，
再亼入粄粹肚，愛亼到軟韌正做得，
放幾多粄嫲，有異大學問哦！
忒少會毋罅黏，忒多會噍毋綿。

亼好个粄粹，分做細矻，磨做粄皮，
再包入合意个餡放落鑊肚煮，
煮到惜圓浮起來，就好哩！

煮好个惜圓，順口，又滑溜。
跈等日頭光，黏時，轉到頭擺時。
就像轉到老街巷口。

人客問：
「正月半淨食惜圓定定喔？」
頭家講：
「還有一種非常特殊个食品，安到新丁粄。
摎佢疊起來敬拜天地，
答謝天公，
祈求保佑細人仔康健會大。」

糯米摎蓬萊米，挨做粄漿，
矺出水，大約愛七分燥哦，
將生米糰放入籠床，
炊到熟，抹兜仔油，放入粄模，面項膏大紅，
食个時節切長條形，委兜鹽水，再過來煎，
食到長壽幸福年年。

有一個人客講
「𠊎知糯米做个客家菜包，乜當好食。」
「客家菜包，香噴噴，
外形親像係籠裝豬个樣款，圓滾滾仔。
糯米做粄皮，包入好食个餡，
䀴起來就像頭擺裝豬仔个竹籠呢，
所以安到『豬籠粄』。
清明時，也會做來敬阿公媽。」

有人客問講：
「有粄條無？」
頭家講：「想食老味緒，就愛食粄條。
輕輕仔唶一下，定定仔咬，滑溜又耐噍。」

水摎秥米挨做粄漿，
倒入模仔裡肚放平炊熟，
將炊好个粄片摺好，
用刀仔切到堵好闊，
加入配頭共下來炒，
炒粄條就做好哩喲！

「𠊎想食米篩目。」
「無問題，
米篩目，湯中浮浮冇冇，
一條一條清清楚楚，食着歸嘴个滿足。」

摎在來米挨做粄漿，
加兜仔番薯粉摎水，變做粄粹，
過將粄粹篩入滾水裡肚煮，
煮好過冷水，撈起來放分佢燥，
再摎配頭共下煮抑炒，
無都加入糖水變做米篩目冰，
不管鹹个甜个做下恁好食哦！

有人問：「辦好歪事該下食麼个呢？」
頭家講：「有好歪事、王爺生，拜喏這兜，
定著愛提糍粑來招待人客。」

將糯米炊熟，放入舂臼裡肚舂，
過用手亼，食个時搵兜地豆粉，
香香軟軟，盡承牙哦。

頭家講：
「係講過五月節，七月半普渡該下，
做下愛食粽。
毋管係焿粽，抑係鹹粽，
炊有成點鐘，
大麻粒食得飽呢。」

人客來，開容笑面；
頭家人，請食甜粄。

「過年時，做麼个大體係阿嬤來做甜粄？」
「因為甜粄个外型做着靚無，
會關係到明年个運數，一等要緊呢。」

摎糯米浸透挨做粄漿，
煮烏糖水，放入去亼勻，
上籠床，大火炊熟，就做得哩。
有人會加烏麻來調味，
炊好略略仔紅霞紅霞个甜粄，
斯係象徵見紅大吉，圓滿美好个意思哦。






【華語原文】

心裡有個地方，有雲升起，有鳥飛翔；
心裡有個地方，有鳥飛起，有光歌唱。
走過長巷，最深的地方有間食堂。

老闆說：
「歡迎大家，來到客家米食樂，
我們的特色是所有食物都是用米做的。」

客人問：
「客家人的米食，有很多種類嗎？」
老闆回答
「你聽過客家粄十唸嗎？
頭椎，油椎仔。
二糍，糍粑　
三甜粄，鹹甜粄，花生粄，紅豆粄。
四惜圓，湯圓，元宵，粄圓，雪圓。
五包，豬籠粄，地瓜菜包，艾粄，甜包。
六粽，米粽，粄粽，粳粽，甜粽。
七碗粄，水粄仔。
八摸娑，米篩目。
九層糕，粄條。
十紅桃，紅粄，龜粄，長錢粄，新丁粄。
你看，光是粄類就有這麼多種呢。」

「為什麼客家人有這麼多用米做的食物？」
老闆回答：
「吃飯容易飽啊！
以前農耕時代，客家人住在山區，
耕作收成之後，為了便於保存、攜帶，
會將糯米做成粄類的食品。

另外，每到年節慶典，
家家戶戶也會磨米，
再配上各種佐料，
製出各式各樣的米製點心，
來祭拜神明、祖先，
保佑闔家平安，或是招待親戚朋友。」

客人問：
「年初過元宵，該吃甚麼好？」
老闆說：
「要不要來碗糯米做的粄圓？
熱熱暖暖、彈牙，又不黏。」

把糯米，在來米，和水磨成米漿，
再裝進布袋裡，用磨刀石壓出多餘的水分，
做成粄粹。

取一部分煮熟作粄媽，
再揉入粄粹內，揉到軟韌，
放多少粄媽，大有學問！
太少不夠黏，太多嚼不爛。

揉好的粄粹，分成小塊，擀成麵皮，
包入喜歡的內餡下鍋煮，
煮到粄圓浮起，就完成了！

粄圓，順口，滑溜。
陽光，瞬間，倒流。
彷彿回到老街，巷口。

客人問：
「元宵只能吃粄圓嗎？」
老闆說：
「還有一種非常特殊的食品，叫做新丁粄。
把它疊起來敬拜天地，
感謝老天。，
祈求保佑小孩健康長大。」

把糯米和蓬萊米，磨成米漿，
壓出水，大約七分乾，
把生米糰放入蒸籠，
蒸到熟，抹點油，放入模具，刷上色，
吃的時候切長條，灑點鹽水，再來煎，
長壽幸福年年。

有個客人說：
「我知道糯米做的客家菜包，也很好吃。」
「客家菜包，香噴噴，
籠子裝豬，圓滾滾。
糯米做外皮，包進好吃的餡料，
看起來就像以前裝豬仔的竹籠，
所以叫做『豬籠粄』。
清明節時，也會做來祭拜祖先。」

有位客人，問：
「有沒有粄條？」
老闆說：「要吃古早味，就要點粄條。
輕輕吸，慢慢咬，滑順又耐嚼。」

把水和在來米打成米漿，
倒入模具中攤平蒸熟，
將蒸好的粄片摺好，
用刀切成適當寬度，
加入配料拌炒，
炒粄條就完成了！

「我想吃米篩目。」
「沒問題，
米篩目，湯中浮，
條條清楚，口口滿足。」

把在來米磨成漿，
加點地瓜粉與水，做成粄粹，
將粄粹篩入滾水中煮，
煮完過冷水，
和配料一起煮或炒，
或是加入糖水變成米篩目冰，
不管鹹的甜的都很好吃！

有人問：「婚喪喜慶吃甚麼？」
老闆說：「婚喪喜慶、廟會拜拜，
少不了糍粑，招待人客。」

將糯米蒸熟，放進石臼裡搗，
再用手揉搓，吃時沾花生粉，
香香軟軟，有彈性。

老闆說：
「至於五月五過端午，中元普渡，
都要吃粽子。
不管是粳粽，還是鹹粽，
蒸約一小時，
大顆吃得飽。」

客人，眉開眼笑；
老闆，請吃年糕。

「過年時，為什麼多半由阿婆來做甜粄？」
「因為甜粄的外型漂不漂亮，
關係未來一年的運勢，非常重要！」

把糯米浸透磨成米漿，
煮紅糖水，加入搓揉均勻，
上蒸籠，大火蒸熟，就可以了！
有人會加黑芝麻來調味，
淺紅色的甜粄，
象徵見紅大吉，圓滿美好。