癩蝦蟆和鼴鼠都想娶拇指姑娘，可是拇指姑娘不想嫁，幸好她之前幫助過燕子，燕子帶來她到花精靈的國家，拇指姑娘才能獲得幸福。

頭擺有一個細妹人，佢無降細人仔，當希望做得有一個細人仔。
有一日，佢得着一粒仁，無幾久仁暴芽，開出一蕊鬱金香，
花苞裡背坐吔一隻淨半截手指公恁大个細阿妹仔，
細妹人當歡喜个講：「恁細隻个細阿妹仔，還得人惜。」

佢拿一粒桃核來，分手指公姑娘準眠床，
再過拿紫羅蘭花皮準眠床墊仔，玫瑰花皮做被，
同時在桌頂放一盆水，水肚放一皮花皮，
分手指公姑娘做得坐在花皮頂高划船仔。

有一日暗晡，蟾蜍阿姆看着手指公姑娘，想愛討轉去做心臼，
佢同手指公姑娘帶轉屋下，同手指公姑娘䌈在一皮蓮葉頂項。
毋過，手指公姑娘毋肯嫁分蟾蜍，佢噭到當傷心。
細魚仔同揚擛仔當毋盼得手指公姑娘，
細魚仔𢯭手同蓮葉个根咬斷，揚擛仔拉等蓮葉向前飛，
帶手指公姑娘對蟾蜍个屋下走出去。

無幾久，有一隻大金蛄仔飛過來，佢當中意手指公姑娘，
就同手指公姑娘抓（音saˊ）走，飛到一頭樹仔項。
這央時，其他个金蛄仔乜飛過來，講：
「有六支腳，佢淨兩支，生到還怪唷！」
大金蛄仔聽吔，試着大家講个異有道理，
就同手指公姑娘擲在一蕊花頂高，飛走哩。

手指公姑娘用草葉同自家編吔一頂細眠床，
再過同細眠床吊在一皮大葉仔下背。
恁仔，落雨天就毋驚分雨水涿濕哩。

毋過，寒天到哩，大葉仔燥忒吔，淨伸着一條莖，
手指公姑娘試着當寒，厥衫都爛忒吔，
雪打在手指公姑娘身頂高，就像分一大堆个雪矺等。

手指公姑娘行出樹林外背來尋食个，
樹林外背係一大片个麥仔田，
毋過麥仔既經割忒，淨伸着光華華仔个麥仔稈。
手指公姑娘又肚飢又寒，在麥仔田昏忒哩，
好得田鼠阿婆看着，收留佢。

有一日田鼠阿婆講：
「吾鄰舍逩地龍愛來看𠊎，
佢當有錢，你係嫁分佢，食著就毋使愁哩。」
逩地龍斷真愛着手指公姑娘，
毋過手指公姑娘毋想同瞎目个逩地龍結婚。

逩地龍為着輒輒看着手指公姑娘，
䟓䟓對厥屋下，挖吔一條地道來田鼠阿婆个屋下。

有一日佢請田鼠阿婆同手指公姑娘來地道裡背散步，
發現地道裡背有一隻凍到硬鉸个燕仔。

手指公姑娘試着該隻燕仔當衰過，
就用草葉編一條毯仔，蓋到燕仔身頂高，
還過用棉花同燕仔个脣項塞到淰淰，
原本凍到硬鉸个燕仔，因為燒暖吔又返生哩。

手指公姑娘用心个照顧燕仔，
分燕仔在地道裡背過吔一隻寒天，
這兜事情田鼠阿婆同逩地龍先生都毋知。

春天到吔，燕仔愛走哩。
燕仔問手指公姑娘：「你肯同𠊎共下離開無？」
手指公姑娘拂（音fin）頭，講：
「係講𠊎恬恬仔離開，田鼠阿婆定著會當傷心。」
燕仔聽吔，敨吔一口氣，翼翍翍仔飛向日頭花。

逩地龍先生田鼠阿婆講，佢想愛討手指公姑娘做餔娘。
手指公姑娘對田鼠阿婆講：
「𠊎無愛同逩地龍先生結婚，乜毋想一生人歇在地道裡背。」
田鼠阿婆聽吔當譴，佢講：
「嫁分好額个逩地龍，有麼个毋好？
你係毋聽話，𠊎就愛用牙齒咬你囉！」

手指公姑娘當驚，高不將答應哩。
結婚該日，逩地龍先生打扮到整整齊齊，對地道行過來迎親。
手指公姑娘當當準備跈逩地龍先生行入地道个時節，
聽着半天頂傳來「滴哩」个歌聲，
原來係該隻燕仔轉來哩！

燕仔再過問手指公姑娘：「你肯跈𠊎走無？」
「𠊎肯！」
手指公姑娘講忒，騎在燕仔背囊項，
燕仔帶等手指公姑娘，飛到一個燒暖个國度。

佢同手指公姑娘放在一蕊花頂，
手指公姑娘看着花中央坐等一個細細隻个男仔人。
這儕人个頭那頂戴等花冠，肩頭項有一對細細仔个翼，
原來佢就係花精靈个國王。

國王問手指公姑娘，肯做厥王后無？
手指公姑娘歡喜个應（音en ）好。
故所國王同手指公姑娘辦吔當鬧熱个婚禮，過等幸福个日仔。






【華語原文】

從前有個女人，她沒生小孩，很希望能有一個孩子。
有一天，她得到一顆種子，不久種子長大，開出一朵鬱金香，
花瓣裡面坐著一個只有半個拇指大的小女孩，
女人很高興說：「好小的姑娘，真可愛。」

她拿來一顆桃核，給拇指姑娘當床，
再拿紫羅蘭花瓣當床墊，玫瑰花瓣做被子，
同時在桌子上放了一盆水，水裡放一片花瓣，
讓拇指姑娘可以坐在花瓣上划船。

有一天晚上，癩蝦蟆媽媽看到拇指姑娘，想給兒子做新娘，
她把拇指姑娘帶回家，把拇指姑娘綁在一片蓮葉上。
可是，拇指姑娘並不願意嫁給癩蝦蟆，她哭得很傷心。
小魚和蝴蝶非常同情拇指姑娘，
小魚幫忙把蓮葉的莖咬斷，蝴蝶拉著蓮葉往前飛，
帶著拇指姑娘逃出癩蝦蟆的家。

不久，有隻大金龜子飛過來，他很喜歡拇指姑娘，
便抓起拇指姑娘飛到一棵樹上。
這時其他的金龜子飛過來，說：
「我們有六條腿，她只有兩條，長得好奇怪！」
大金龜子聽了，覺得大家說得很有道理，
就把拇指姑娘扔在一朵花上，飛走了。

拇指姑娘用草葉給自己編了一張小床，
再把小床掛在一片大葉子下面。
這樣，下雨天就不怕被雨水打濕了。

然而，冬天到了，大葉子枯萎了，只剩下一根莖，
拇指姑娘覺得好冷，她的衣服都破了，
雪花打在拇指姑娘身上，就像一堆雪壓在她的身上。

拇指姑娘走出樹林找吃的，
樹林外是一片麥田，
可是麥子已經收割，只剩下光禿禿的麥梗。
拇指姑娘又餓又冷，昏倒在麥田裡，
幸好田鼠婆婆看到，收留了她。

一天田鼠婆婆說：
「我的鄰居鼴鼠要來看我，
他很有錢，如果你嫁給他，就不愁吃穿了。」
鼴鼠果然愛上了拇指姑娘，
可是拇指姑娘並不想和瞎眼的鼴鼠結婚。

鼴鼠為了可以經常看到拇指姑娘，
特地從他家，挖了一條地道到田鼠婆婆家。

有一天他請田鼠婆婆和拇指姑娘到地道裡散步，
發現地道裡有一隻凍僵的燕子。

拇指姑娘那隻燕子覺得可憐，
便用草葉編成一條席子，給燕子蓋上，
再用棉花塞滿燕子身邊，
原本凍僵的燕子，因為溫暖又活了過來。

拇指姑娘用心的照顧燕子，
讓燕子在地道裡度過了一個冬天，
這些事情田鼠婆婆和鼴鼠先生都不知道。

春天到了，燕子要走了。
燕子問拇指姑娘：「你願不願意跟我一起離開？」
拇指姑娘搖搖頭，說：
「如果我悄悄離開，田鼠婆婆一定會很難過的。」
燕子聽了，歎口氣，展翅飛向陽光。

鼴鼠先生告訴田鼠婆婆，他想娶拇指姑娘做老婆。
拇指姑娘對田鼠婆婆說：
「我不要跟鼴鼠先生結婚，更不想一輩子住在地道裡。」
田鼠婆婆聽了很生氣，她說：
「嫁給有錢的鼴鼠，有什麼不好？
你要是不肯聽話，我就要用牙咬你囉！」

拇指姑娘非常害怕，只好答應。
結婚那天，鼴鼠先生打扮得整整齊齊，從地道走過來迎娶新娘。
拇指姑娘正準備跟鼴鼠先生走進地道的時候，
聽到空中傳來「滴哩」的歌聲，
原來是那隻燕子回來了！

燕子再次問拇指姑娘：「你願不願意跟我走？」
「我願意！」
拇指姑娘說完，騎在燕子背上，
燕子帶著拇指姑娘，飛到一個溫暖的國度。

他把拇指姑娘放在一朵花上
拇指姑娘看見花中央坐著一個小小的男人。
這人的頭上戴著花冠，肩膀上有一對小小的翅膀，
原來他就是花精靈的國王。

國王問拇指姑娘，願不願意當他的王后？
拇指姑娘高興的答應了。
於是國王和拇指姑娘舉行盛大的婚禮，過著幸福的生活。